Superkupa e Europës ka vënë përballë jo vetëm dy skuadrat më të mira të kontinentit që triumfuan në Champions dhe Ligën e Europës, por edhe dy trajnerët më të mirë në botë.

Bajerni i Mynihut dhe Çelsi do zbresin në stadiumin e Pragës më 29 gusht për të zhvilluar këtë finale. Në Çeki do përballen dy shokët që në vitin 1996 bënin pjesë në një skuadër, por tipat e ndryshëm dhe karakteri i tyre kanë bërë që t’i shpallin luftë njëri-tjetrit duke kaluar çdo kufi. Zhoze Murinjo ishte asistent i Van Galit në 1996-ën dhe Guardiola ishte “nxënësi” i tij. “Kemi bashkëpunuar 4 vite bashkë. Siç më njeh mua Murinjo, ashtu e njoh edhe unë atë”,- pati thënë Pep pas një sfide në vitin 2011. Ndërkohë, Zhoze Murinjo, edhe pse e ka fituar dy herë Champions-in, nuk ka mundur të zhvillojë një Superkupë, pasi është larguar menjëherë nga Porto dhe Inter. Kurse Guardiola ka fituar gjithçka në vitin 2009 dhe 2011. Gjatë një interviste për “Uefa.com”, Zhoze Murinjo flet për Bajernin, rikthimin e tij te Çelsi dhe Superkupën.
Z. Mourinho, si u ndjetë pas rikthimit te Chelsea?
Unë jam pjesë e një klubi, ku më përshtatet gjithçka. Dhe jam në vendin ku dua të jetoj dhe e shoh si privilegj. Shumë të tjerë duan të jetojnë në një vend apo të drejtojnë një klub, por nuk kanë asnjë mundësi. Duke iu referuar eksperiencës sime në shumë vende të ndryshme, në Londër ndihem më i lumtur.

Ç’kuptim ka për ju Superkupa e Europës?
Për ne është një titull, të cilin duam ta fitojmë. Në Superkupë luhet për trofe dhe të gjithë e dimë që nuk është njësoj me evenimentet e tjera ku duhet të fitosh shumë sfida. Bëhet fjalë vetëm për një duel dhe në futboll s’para ka shumë rëndësi, por është një titull me prestigj. Këtë kupë do ta preferonte çdo klub në vitrinë. Pra, ne për këtë do përpiqemi.
Para tri viteve fituat tripletën me Interin, por këtë sukses e arriti dhe Bajerni…
Të fitosh tre trofe është tepër e vështirë dhe këtë e realizojnë vetëm ekipe me mentalitet fituesi dhe kualitet të lartë futbolli. Ashtu si Bajerni mbajti lart nivelin dhe ambiciet e tij në tri kompeticione ishte fantastike dhe neve të gjithëve na ra në sy. Jup Hejnkes bëri një punë të shkëlqyer. Natyrisht që u impresionova nga mënyra se si funksionoi e gjithë paketa e tij strategjike sezonin e kaluar. Tani të luash kundër ekipit më të mirë të vitit të kaluar është një sfidë për ne. Për ne është një përcaktim pozicioni. Na duhet të luftojmë dhe të krahasohemi me më të mirët dhe nga ky moment e mësojmë se ndaj kujt do luajmë në fazën në grupe.

Cili është synimi juaj në Champions?
Për ne është qëllimi kryesor të kalojmë fazën në grupe. E shoh si detyrim parësor. Të premten do e njohim kundërshtarin tonë dhe do nxjerrim prej tyre gjithçka. Ajo ndeshje do na shërbejë si një matës për të ditur se ku jemi.
Patët thënë se Bajerni i Hejnkesit ishte më i miri i Europës dhe vërtet e faktuan. Po te Bajerni i Guardiolës s’keni besim?
Për veprat e Hejnkesit kam respekt dhe Bajerni shkëlqeu, i meritoi tre trofetë. Tani, ata kanë marrë trajner dhe lojtarë të rinj dhe nuk jam më i sigurt nëse do jenë më aq të mirë sa me Hejnkesin.
Sa e vështirë ka qenë për ju të përshtateni sërish me Çelsin, pasi kanë kaluar 6 vite?
Mua më duket sikur kam kohë që e drejtoj këtë skuadër. Deri tani jam shumë i kënaqur me rezultatet dhe sigurisht na duhet ende kohë për t’u përshtatur dhe realizuar objektivat që duam. Rëndësi ka që jemi në rrugë të mbarë.