Në Selanik do të përkujtohet 101 vjetori i Çlirimit të Shkupit

12.08.2013 (komentet: 0)

Qytetare te Shkupit, gjate ceremonise se perurimit te bustit te patriotit Hasan Prishtina ne sheshin “Skenderbeu”, ne Shkup.

Sot me 12 gusht bëhen 101 vjet nga Çlirimi i Shkupit nga forcat kryengritëse shqiptare të udhëhequra nga mendjendrituri dhe strategu ushtarak Hasan Prishtina, si dhe komandantë të dëshmuar në luftën e popullit shqiptar për liri dhe pavarësi, si Bajram Curri, Isa Boletini, Ali Shefqet Shkupi, Mehmet pashë Deralla, Idriz Seferi, Bajram Daklani, etj.

Çlirimi i Shkupit më 12 gusht 1912, është një nga ngjarjet më madhore në historinë e kombit shqiptar, i cili përgatiti masat e gjera popullore dhe opinionin ndërkombëtar, për shpalljen e Pavarësisë së Shqipërisë nga Perandoria Osmane.

Në një kumtesë të shpërndarë për mediat, Shoqata e Historianëve Shqiptarë në Maqedoni (SHHSHM) përkujton ngjarjen më madhore të kombit, të shënuar më 12 gusht të vitit 1912, që i parapriu shpalljes së Pavarësisë së Shqipërisë nga Perandoria Osmane.

Njëherit Shoqata e Historianëve Shqiptarë në Maqedoni dhe Mehmet Prishtina (nipi i Hasan Prishtinës v.j)njoftojnë se këtë vit organizojnë manifestim përkujtimor me rastin e 80-vjetorit të vrasjes së atdhetarit Hasan Prishtina në Selanik të Greqisë, shkruan Illyria.

Në kumtesën e Shoqatës së Historianëve Shqiptarë në Maqedoni e lëshuar për mjetet e informimit thuhet se Manifestimi qendror do të mbahet më 13 gusht 2013 në Selanik, ku përveç historianëve, pritet të marrin pjesë edhe drejtuesit e Institutit të Trashëgimisë Shpirtërore dhe Kulturore të Shqiptarëve të Maqedonisë, Universitetit të Kosovës “Hasan Prishtina”, Universitetit Shtetëror të Tetovës, Mehmet Prishtina, përfaqësues të lobit shqiptar në botë dhe personalitete tjera publike.

“Shoqata e Historianëve Shqiptarë në Maqedoni i uron të gjithë shqiptarët për këtë ngjarje të madhe historike, duke i përkujtuar se ideja e kryengritësve shqiptarë të udhëhequr nga Hasan Prishtina, ishte që Pavarësia e Shqipërisë të shpallet pikërisht në Shkup, por ky plan u sabotua”, thuhet në kumtesën e SHHSHM,transmeton "zhurnal.mk"

 

xlpress.tv

Kthehu mbrapa

Shto koment