Majko kundër Kuçit: Jo traktat paqeje me Serbinë

10.08.2012 (komentet: 0)

Idenë e zëvendëskryeministrit të Kosovës, Hajredin Kuçi, për një traktat paqeje me Serbinë, e ka kundërshtuar edhe deputeti i Partisë Socialiste, njëherësh ish-kryeministri i Shqipërisë në kohën e luftës në Kosovë, Pandeli Majko.

Majko ka thënë se aktualisht një traktat paqeje mes Serbisë dhe Kosovës do të vendosej detyrimisht në kuadër të një dokumenti ndërkombëtar, që momentalisht do të ishte kryesisht Rezoluta 1244, raporton KTV. 

“A do të pranonte Kosova të hynte në kontekstin e këtij dokumenti në bisedime për një traktat paqeje? Për Serbinë, Rezoluta 1244, e cila përmban edhe fjalën ‘Jugosllavi’, do të nxiste perceptime juridike dykuptimëshe. Për Serbinë kjo do të ishte marrëveshja mes ‘Shtetit’ dhe ‘Krahinës’”, - ka thënë Majko. 

Ish-kryeministri shqiptar ka thënë se një situatë e tillë do të rihapte debate edhe në NATO rreth vazhdimit të prezencës ushtarake në Kosovë, e cila garanton paqen. 

Ideja e zëvendëskryeministrit Kuçi që Kosova të bëjë një traktat të paqes me Serbinë, ka nxitur reagimin edhe të liderit të Lëvizjes Vetëvendosje, Albin Kurti, i cili ka thënë se Kosova nuk mund të bëjë traktat pasi që nuk ka ushtri dhe një Traktat i Paqes ishte Marrëveshja e Kumanovës ndërmjet NATO-s dhe Ushtrisë së Jugosllavisë. 

Por zëvendëskryeministri vazhdon të përkrahë idenë e tij, duke thënë se pas çdo konflikti mes dy shteteve vendoset një traktat i paqes. 

Kthehu mbrapa

Shto koment