Berisha drejt Turqisë, do ftojë turqit të investojnë në Shqipëri

05.04.2012 (komentet: 0)

I ftuar nga homologu turk Recep Tayyip Erdogan, kryeministri Sali Berisha u nis të enjten për një vizitë zyrtare dyditore në Turqi.

Siç bën me dije zyra e shtypit e kryeministrit, mësohet se gjatë vizitës në Turqi, Berisha do të zhvillojë takim kokë më kokë me kryeministrin Erdogan, takim i cili do të pasohet nga bisedimet mes dy delegacioneve.

Gjatë vizitës do të nënshkruhen “Memorandumi i Mirëkuptimit për Bashkëpunimin midis Akademisë së Diplomacisë të Ministrisë së Punëve të Jashtme të Republikës së Turqisë dhe Akademisë Diplomatike të Ministrisë së Punëve të Jashtme të Republikës së Shqipërisë” dhe “Marrëveshja e Bashkëpunimit në Fushën e Arkivave midis Ministrisë së Punëve të Jashtme të Republikës së Turqisë dhe Ministrisë së Punëve të Jashtme të Republikës së Shqipërisë”.

Kryeministri Berisha do të ketë gjithashtu takime me Presidentin e Republikës Abdullah Gül dhe me Kryetarin e Asamblesë se Madhe Kombëtare të Turqisë Cemil Çiçek.

Në ditën e dytë të vizitës, Berisha do të këtë një mëngjes pune me ministrin e Punëve të Jashtme Ahmet Davutoğlu.

Takimet dhe bisedimet me personalitetet më të larta turke evidentojnë nivelin shumë të lartë të marrëdhënieve politike mes dy vendeve, si dhe i shërbejnë forcimit të mëtejshëm të tyre.

Një vëmendje e veçantë do t’i kushtohet gjithashtu thellimit dhe zgjerimit të marrëdhënieve ekonomike mes dy vendeve.

Këtij qëllimi do t’i shërbejë edhe pjesëmarrja e Kryeministrit në Forumin e Biznesit, që organizohet nga Bashkimi i Dhomave dhe Bursave të Turqisë.

Kryeministri do t’i drejtohet Forumit me një fjalë, ku pritet të japë një panoramë të përgjithshme të klimës së biznesit në Shqipëri, reformave që ka ndërmarrë dhe hapave të rinj që pritet të implementojë qeveria shqiptare për ta bërë edhe më atraktive e konkurruese klimën për biznes e investime në Shqipëri.

Berisha pritet të flasë edhe për potencialet që ofron vendi ynë në sektorë të ndryshëm të zhvillimit, siç është turizmi etj...

Në fjalën e tij, kryeministri do të ftojë biznesmenët turq për të investuar në Shqipëri, duke i garantuar ata se investimi i tyre do të jetë një histori suksesi.

Në takimin me biznesin turk, Kryeministri do të shoqërohet edhe nga një grup përfaqësuesish të biznesit shqiptar. /NOA/

Kthehu mbrapa

Shto koment