Matura shtetërore më 9 dhe 23 qershor

05.04.2012 (komentet: 0)

Provimi shtetëror i maturës do të mbahet më 9 dhe më 23 qershor. Ministria e Arsimit, Shkencës dhe Teknologjisë, ka bërë të ditur se sivjet për herë të parë në Kosovë provimi i maturës do të mbahet në dy pjesë dhe do të organizohet dy ditë.

Pjesa e parë e provimit dhe e dyta do të kenë një hapësirë kohore ndërmjet tyre prej 14 ditësh. Ndryshimet rreth organizmit të provimit “Matura shtetërore 2012” , MASHT ua ka përcjellë edhe drejtorive komunale të arsimit nëpër komuna.

Zëvendësministri i Arsimit, Nehat Mustafa, ka bërë të ditur se këtë vit provimit të maturës do t’i nënshtrohen rreth 32 mijë maturantë të rregullt, të cilët do të testohen në dy ditë, përkatësisht më 9 dhe 23 qershor.

“Kemi vendosur që maturën ta organizojmë në dy ditë. Në ditën e parë, më 9 qershor, do të përfshihen 120 pyetjet nga lëndët e përgjithshme, gjuhë shqipe, gjuhë angleze dhe matematikë. Ndërsa më 23 qershor do të mbahet vazhdimi i provimit, ku do të ketë një test me 80 pyetje. Testi i sivjetmë në total do të përmbajë gjithsej 200 pyetje”, ka thënë ai, transmeton “Zëri”.

Mustafa ka theksuar se gjatë procesit të ndryshimit të provimit të maturës, Komisioni Qendror Shtetëror i Maturës (KQSHM) ka pasur konsulta edhe me maturantë të pothuajse të gjitha shkollave të Republikës së Kosovës, ku përveç maturantëve kanë marrë pjesë edhe drejtorët e shkollave. Ai ka vlerësuar se ndryshimet të cilat KQSHM-ja i ka bërë këtë vit, janë ndryshime përmes të cilave përfitojnë maturantët. /Telegrafi/

Kthehu mbrapa

Shto koment