Lutfi Haziri: Pas premierës, Gjilani rikonfirmoi se është Kryeqytet Kulturor i shqiptarëve

27.07.2016 (komentet: 0)

 

 Nën përkujdesjen e kryetarit të Komunës së Gjilanit, në kuadër të Muajit të Mërgimtarëve, mbrëmë është dhënë premiera e shfaqjes "Vdekja aksidentale e një anarkisti”, nga Dario Fo, me regji të Erson Zymberit, e cila zgjoi interesim të madh të publikut.

 

 

Pas premierës, kryetarit i Gjilanit, Lutfi Haziri, vlerësoi se me pjesëmarrjen masovike të publikut gjilanas, u dëshmua sërish se Gjilani vazhdon të jetë Kryeqytet Kuluturor i shqiptarëve.

 

“Komuna e Gjilanit tashmë e ka kthyer traditën e përcjelljes së shfaqjeve, edhe atë me interesim të jashtëzakonshëm të publikut. Pas dhënies së shfaqjes nga aktorët ge teatrit të Gjilanit dhe me pjesëmarrjen rekorde të publikut, nuk u zbulua uji i nxehtë, por veç u rikonfirmua se Gjilani vazhdon të jetë Kryeqytet Kulturor i shqiptarëve”, ka thënë Haziri.

 

Regjisori i shfaqjes, Erson Zymberi, ka thënë se “Vdekja aksidentale e një anarkisti”, në shtjellimin e saj konceptual dhe artistik, prekë dhe njëkohësisht tenton t'u përgjigjet trajtimit të problemeve aktuale të ligjit, korrupsionit, sistemit gjyqësor, dosjeve, akuzimeve, vrasjeve, etj.

 

Kjo shfaqje u realizua nga regjisori Erson Zymberi, i ndihmuar nga asistentja e regjisë Emine Toska, me aktorët: Ernest Zymberi, Alban Shahiqi, Avni Shkodra, Gani Rrahmani, Njomëza Kalaveshi dhe Tringa Hasani.

 

Reprizat e shfaqjes "Vdekja aksidentale e një anarkisti” parashihen të jepen po në Teatrin e Gjilanit, për ata që nuk patën mundësi të ishin pjesë e premierës.​

Kthehu mbrapa

Shto koment