Kryetari Haziri e presidentja Jahjaga porosisin qytetarët që të mos migrojnë ilegalisht

11.02.2015 (komentet: 0)

Displaying Vizita e Presidentes (2).JPG

 Kryetari i Komunës së Gjilanit Lutfi Haziri, i shoqëruar nga kryesuesja Valentina Bunjaku Rexhepi, nënkryetari Rexhep Kadriu dhe shefi i i Kabinetit, Arbër Ismajli, ka pritur sot në takim presidenten e Republikës, zonjën Atifete Jahjaga.

 

Qëllimi i takimit në mes të presidentes Jahjaga dhe kryetarit Haziri ishte për të përçuar mesazhin e përbashkët kundër migrimit ilegal të qytetarëve në perëndim.

Pas takimit në Zyrën e kryetarit, presidentja Jahjaga dhe kryetari Haziri kanë ecur në këmbë duke takuar dhe biseduar me qytetarë, derisa patën edhe një kafe rasti me të rinjtë e Gjilanit.

Në prononcimin para medieve, kryetari Haziri e ka falënderuar presidenten për respektin dhe vlerësimin që ka treguar për gjilanasit me rastin e 70-vjetorit të masakrës së Gjilanit, sikurse edhe për vizitën e saj të parë zyrtare për të përçuar mesazhin kundër migrimit ilegal.

Displaying Vizita e Presidentes (4).JPG

“Me këtë rast vizita ka të bëjë me biseda të drejtpërdrejta edhe me komunën edhe me qytetarët lidhur me lëvizjet e fundit drejt perëndimit. Personalisht kam qenë i angazhuar me policinë dhe prokurorinë e shtetit që të punojmë shumë në parandalimin e pjesëmarrjes në luftëra të huaja dhe në ‘tokën e Shamit’ që është një shqetësim serioz i joni. Lëvizja drejt perëndimit për gjilanasit nuk është normale sepse në këtë fazë duhet t’i japim shancë marrjes së datës për liberalizimin e vizave. Është mundësia e vetme legale për t’iu bashkangjitur familjeve tona jashtë ose për të parë mundësi më të mëdha”, është shprehur kryetari Haziri.

I pari i gjilanasve ka ripërsëritur qëndrimin e tij se udhëheqësit politik janë shkaktarë që qytetarët e kanë humbur shpresën në marrjen e liberalizimit të vizave

“E ruaj vlerësimin që e kam dhënë edhe më herët që ne, udhëheqësit politik, jemi shkaktarë që qytetarët e kanë humbur shpresën në marrjen e liberalizimit të vizave dhe në integrim të shpejt europian. Besoj shumë që tash edhe me angazhimin e presidentes, e cila udhëheq mekanizimin për integrime evropiane, do ta detyrojë qeverinë dhe institucionet tjera të punojnë më shumë, të angazhohen më shumë në mënyrë që t’i ofrojmë shpresë qytetarëve, e në veçanti rinisë së Kosovës, e në këtë rast edhe rinisë së qytetit tonë. Qytetarët treguan problemet e tyre, që kryesisht janë probleme sociale që trajtohen nga ana e Komunës, por që natyrisht duhet ta rrisim fondin dhe mundësitë në mënyrë që qytetarët të punojnë vetë nga të jetojnë vetë nga djersa e tyre, e jo me qenë të varur qind për qind në kartelën sociale”, ka theksuar kryetari Haziri.

Nga ana e saj, presidentja e vendit, Atifete Jahjaga, tha se rruga e migrimit ilegal, nuk është rrugë e lehtë, është përplot me rreziqe dhe e pa garantuar.

“Jam sot këtu në Komunën e Gjilanit për të bashkëbiseduar me qytetarë, për të parë nga afër gjendjen, brengat, hallet, por edhe arsyet e largimit të numrit shumë të madh të qytetarëve tanë nga vendi. Rruga e migrimit ilegal nuk është rrugë e lehtë, është përplot me rreziqe dhe e pa garantuar. Si institucione jemi të përkushtuar të punojmë për ndërtimin e një mirëqenie më të mirë të qytetarëve, për ndërtimin e jetës më të mirë për qytetarët, në mënyrë që t’u kthejmë besimin dhe dinjitetin. Kjo rrugë nuk është mesazh i mirë për Kosovën si shtet, për qytetarët tanë në përgjithësi, e veçanërisht për rininë tonë, që është pasuria më e madhe e jona. Kjo rrugë bëhet edhe më e pasigurt, pas deklarimeve nga shtetet e BE-së, të cilat e kanë thënë se të gjithë këta qytetarë do të kthehen në Kosovë”, tha Jahjaga.

Presidentja e Republikës pohoi se e ardhmja e të rinjve është në Kosovë, por duhet të punohet për ndërtimin e saj.

“Bëjë thirrje që të ndalet migrimi ilegal. E ardhmja është këtu, por duhet të punojmë për ndërtimin e saj këtu në Kosovë. Institucionet qendrore dhe ato lokale janë të përkushtuara të punojnë në shtet-ndërtimin tonë, dhe kjo bëhet bashkërisht duke jetuar, punuar dhe zhvilluar vendin, kjo bënë të mundur integrimin më të lehtë dhe më të shpejt të vendit në strukturat euroatlantike që është edhe synimi kryesor i të gjithë neve”, ka thënë presidentja Atifete Jahjaga.

Ndryshe, kjo është vizita e parë në komunën e Gjilanit e presidentes së Republikës së Kosovës, Atifete Jahjaga.

 /kokaj.net/

Kthehu mbrapa

Shto koment