Haziri kërkon nga qeveria që të ndal diskriminim buxhetor për Gjilanin, për ta kthyer në një vend të mundësive

01.04.2014 (komentet: 0)

Gjilan, 1 prill - Është mbajtur sot në Gjilan debati për zhvillimin ekonomik dhe perspektivën e anamoravës, në të cilin ka marrë pjesë kryetari i Gjilanit, Lutfi Haziri së bashku me drejtorin e Zhvillimit Ekonomik, Ismail Januzi, zëvendërkryeministri Behgjet Pacolli i shoqëruar nga ministri i Zhvillimit Ekonomik, Fadil Ismajli dhe i ai i Tregtisë dhe Industrisë, Bernard Nitaj dhe kryetari i Kamenicës Begzad Sinani. Në këtë debat kanë marrë pjesë edhe përfaqësues të bizneseve gjilanase.

Në fjalën e rastit, kryetari i Gjilanit Lutfi Haziri ka thënë se Gjilani dhe Anamorava në përgjithësi këto vitet e fundit vazhdimisht kanë qenë të diskriminuar në aspektin buxhetor.

Ai tha se Gjilani është Komuna që në dhjetëvjeçarin e fundit nuk është investuar në asnjë infrastrukturë regjionale edhe përkundër pozitës që Gjilani është si qendër regjionale e anamoravës, që ka korridorin ndërkombëtar shumë afër.

“Duhet një kujdes i shtuar, për të kthyer zhvillimin ekonomik në Gjilan. Raporti buxhetor që ekziston sot, tregon se jemi Komuna e vetme që shpenzon më shumë në mallra dhe shërbime se sa në investime. Jemi Komuna që në dhjetë vjeçarin e fundit nuk është investuar në asnjë infrastrukturë regjionale edhe përkundër pozitës që Gjilani është si qendër regjionale e Anamoravës, që ka korridorin ndërkombëtar shumë afër, që e kaluara dhe e tashmja e saj tregojnë qartë se me një “infuzion” dhe me një investim duke u bazuar fillimisht në vullnet politik, e më vonë në mos diskriminim buxhetor, Gjilanin do ta rikthej nga një disfavor, në një vend të mundësive. Korridori Gjilan – Prishtinë që është edhe lidhja e drejtpërdrejtë e Gjilanit me Prishtinën ndërtimi i rrugës Gjilan – Ferizaj dhe rrugës që çon në portën e Dheut të Bardhë, ndërtimi dhe investimi i daljes që çon në Kumanovë përmes fshatit Stanqiq, zgjerimi i rrugës për Preshevë dhe infrastruktura tjetër rrugore, janë detyra që duhet të realizohen”, tha Haziri.

 

Sipas tij, Gjilani është në përparësi nga regjionet tjera sepse ne jemi regjion mikro-europian i pranuar që nga viti 2004.

“Po përmendi një fakt që Gjilani është në përparësi nga regjionet tjera sepse ne jemi regjion mikro-europian i pranuar që nga viti 2004 dhe Gjilani e ka amblemën e Parlamentit Europian për qytet të paqes, që pak Komuna në Ballkan e kanë. Kjo emblemë e Gjilanit jep mundësi që përveç qeverisë dhe institucionet financiare të kontraktuara nga ana e qeverisë, i japin të drejtë dhe mundësi të fitimit të projekteve të ndryshme që mund t’i realizojmë. Mikro-regjioni nuk e përfshinë vetëm Anamoravën, por ka 17 Komuna dhe kalon në tri shtete, duke e prek edhe kufirin e Bullgarisë përmes një Komune. Ky mikroregjion duhet të shtyhet në plane dhe master plane të qeverisë”, tha kryetari Haziri.

Haziri ka falënderuar zëvendëskryeministrin Pacolli dhe ministrat e sipërpërmendur për vizitën, duke kërkuar që tash e tutje të kthehet përkujdesja institucionale duke e kthyer përkujdesjen në buxhetim dhe investime, për të shtuar se qytetarët dhe në veçanti bizneset në Gjilan, me gjithë vështirësitë, e kanë trendin pozitiv.

Zëvendëskryeministri Behgjet Pacolli theksoi se është i vetëdijshëm që në Gjilan s’ka pasur investime të nevojshme të qeverisë qendrore, ani pse Gjilani ka dhënë shumë në të gjitha aspektet për ecjen përpara të Kosovës.

Pacolli pohoi se është e dhimbshme që në këtë kohë Gjilan nuk e ka infrastrukturën e nevojshme. Duke përmendur idenë e tij për autostradën Prishtinë – Han i Elezit, zëvendëskryeministri kosovar tha se do të angazhohet edhe për pjesën tjetër të autostradës Ferizaj-Gjilan-Dheu i Bardhë.

Ai përmendi edhe nevojën e krijimit të zonës së lirë ekonomike në Gjilan, pasi sipas tij, nga kjo do të ketë impakt shumë të madh në zhvillimin e ekonomisë së anamoravës.

Ndërsa, duke komentuar premtimin e kryeministrit Thaçi për krijimin e fondit prej 1 miliard eurosh për investime, tha se ky premtim është i paakceptueshëm duke e cilësuar si ‘fantazi të kryeministrit’.

Në këtë debat morën pjesë aktive me pyetje edhe përfaqësuesit e bizneseve gjilanase, të cilët, i shtruan pyetje panelistëve për shumë çështje që lidhen me zhvillimin e ekonomisë në Gjilan.

 

Zyra për Informim

Kthehu mbrapa

Shto koment